កំពង់ចាម៖ ក្នុងឱកាសពិធីបុណ្យចេញព្រះវស្សា និងពិធីប្រណាំងទូក ”ង” បណ្តែតប្រទីប អុចកាំជ្រួច និងតាំងពិព័ណ៌ផលិតផល រយ:ពេល ២ថ្ងៃ ក្នុងក្រុងកំពង់ចាម មានភ្ញៀវទេសចរណ៍ជាតិ និងអន្តរជាតិចូលរួមទស្សនាកម្សាន្ត ជាង ៥០ ម៉ឺននាក់។
អភិបាលខេត្តកំពង់ចាម លោក អ៊ុន ចាន់ដា បានឲ្យដឹងទៀតថា ការប្រារព្ធពិធីប្រណាំងទូក ”ង” បណ្តែតប្រទីប អុចកាំជ្រួច និងតាំងពិព័រណ៌ផលិតផល នាថ្ងៃទី២៨ ខែតុលា ឆ្នាំ២០២៣ មានភ្ញៀវទេសចរណ៍ចូលរួមទស្សនា ចំនួន ១៥៧ ៤៦៥នាក់ ក្នុងនោះបរទេស ចំនួន ៧១នាក់។
ចំណែកការប្រារព្ធពិធីនៅថ្ងៃទី ២ ដែលត្រូវនឹងថ្ងៃទី២៩ ខែតុលា ឆ្នាំ២០២៣ មានភ្ញៀវទេសចរណ៍ជាតិ និងអន្តរជាតិចំនួន ៣៥១ ៦០៨នាក់ ក្នុងនោះភ្ញៀវបរទេស ៣១៨នាក់។ ដូច្នេះ សរុបភ្ញៀវទេសចរណ៍ទាំង ២ថ្ងៃ មានចំនួន ៥០៩ ០៧៣នាក់ បរទេស ចំនួន ៣៨៩នាក់។
គួរឱ្យដឹងដែរថា រដ្ឋបាលខេត្តកំពង់ចាមបានរៀបចំ ពិធីប្រណាំងទូក មានរយៈពេល ២ថ្ងៃ នៅថ្ងៃទី២៨-២៩ ខែតុលា ឆ្នាំ នៅវេទិកាអុំទូក ភូមិជ្រោយថ្ម សង្កាត់បឹងកុក ក្រុងកំពង់ចាម និងការតាំងពិព័ណ៌សមិទ្ធផលរដ្ឋបាលក្រុង-ស្រុក មន្ទីរអង្គភាពជុំវិញខេត្ត ពិព័ណ៌ផលិតផលនានា និងការប្រគុំតន្រ្តី រយៈពេល ២ថ្ងៃ ចាប់ពីថ្ងៃទី២៨-២៩ ខែតុលា ឆ្នាំ២០២៣ នៅមាត់ទន្លេ ក្រុងកំពង់ចាម ព្រមទាំងពិធីបណ្តែតប្រទីប និងអុចកាំជ្រួច ដើម្បីចូលរួមអបអរសាទរពិធីបុណ្យចេញព្រះវស្សា និងលើកស្ទួយវប្បធម៌ប្រពៃណី៕
